سلمية يا أمي (شاعر البادية عدنان زعير)

سلمية يا غيمة مطر بالسما فرحانه
ويا لهفة أم ع ولادها خيفانه

اصحي يا أم الكل ليش غفيانه
طلعت الشمس من جبل شمس

اصحي اصحي يا أم المجد
اصحي يا أم الوعد

بعدك نايمة قومي لبشّرك
قبل ما حدا يخبرك ويبشّرك

يمّه اسألي جبل شمس
بلـ علن والهمس

سلمية اليوم غير الأمس
صارت كرومك يا يمّه كلا مساكن

ولهوا صار أسود وداكن
يا يمّه يرحم إيام الطنابر

وإيام السمن والعنابر
ويرحم زوادة الضيف والعابر

وبعدك نايمة قومي لخبرك يا يمّه
قبل ما حدا يفاجئك ويخبرك

اسألي جبال بلعاس
وكل دعسة خيل تنداس

كيف تبدل وتغير الحلاس
يمّه يا يمّه صار عنّا حضارا

حضارة الجنيز ولتوينز
و صار مشروبنا فريز مع لسكوينز

يمّه صار عنّا لـ نص . بنطرون
وقاصة الدلس والفيزون

وصار عنّا لسنتكور ولبنتكور
ولميش ولجل ولفكــستور

وابن عشر سنين يا يمّه صار يشبب الموتور




وبعدك نايمة يا يمّه
قومي لخبرك قبل ما حدا يخبرك

يا يمّه صار عنّا الفير والكوافير
وبون جور بدال صباح الخير

وصرنا نقول لبعضنا كو وكم هير
وتراثيك بلّش من جيوبنا يهر هير

يا يمّه وصلت لعنا لحضارا
متل لبرق وأسرع من لطيارا

وصرنا نخاف الحضارا نتقل عيارا
ونتستر بخيط صوف من غزل سنارا

يا يمّه يرحم البيلون ولكحل ولحنة
وصار عنّا متلن ورنّــة

وصارت وجاهنا ملونة أحمر وبني
من المسكرة والظل ماركت ساحر وجنّي

كان عنّا الفطر والأضحى عيدين
وعمّا ندور يا يمّه نجبلن أخ أخيين

الفلنتاين لحالو صار إلو اسمين
دخلت علينا يا يمّه أسوء العادات
نضّارة وعلك وخيالة البارتات

يا يمّه شق كنا نسمع منك حكايات
صرنا حكاية وقصة من لمخبايات

يا يمّه صار عنّا خط جوال
بكبسة زر منسمع لموال

بعــصر جدي كان الطشط ولنقال
ونقال الأمس صار اسمو الهاتف النقال

يمّه كان اسمنا رعيان للعوجا
يا يمّه ماتت الرعيان وتمت العوجا

صرنا نشوف بعضنا ليوم ع لشاشة
وعقولنا صارت بكمبيوتر وبفلاشة

وكل شي حكيتو يايمّه عند (الفاكــس) ماشي

بيبلع لورقة وأغرب من قميص اللكــس اللي تصنّع من قماشة

يا يمّه صار عنّا انتر وإيميل
نسينا التراث وكلمن مشي بميل

رح اسأل شباب وصبايا لحفل
كيف كان ينحدا لخيل

نسينا لتراث أنا مُصرّ على أقوالي
وبنفس لوقت فال الله ولا فالي

سلمية لأجل تراسك بيرخص لغالي
وبيرخص لمال يا يمّه مع عيالي

سلمية لا تسمعي جبل شمس قصتنا
بيعيّرك . وبيقّلك ولادنا ليوم عصتنا

لا تخبري جبل شمس عنّا
كيف صرنا . صرنا الآخ من بعد ونّه

نشرتي يا يمّه للدنيا فكر
ولليوم نحنا نفتخر بالأدب ولشعر

منعاهدك يا أم الصفا
ويا أم الخلان ويا أم الوفا

منعاهدك يرجع ع بيتك شمس ودفا
ومنعاهدك يا يمّه نعلّم ولادنا

حب الــوطن وبلادنا
ونتمسك بعادات اجدادنا

اسمحيلي اليوم بشّرك
قبل ما حدا يبشّرك

صرنا كل سنة نعملك مهرجان
ونلبّس اسمك ياقوت مرصّع بمرجان

اسألي يمّه عن أهلك بـنيسان
بعيدك ابن سلمية ناموس مطعّم بوجدان

سمحيلي يا يمّه قبّل ترابك بعيدك
وقبّل جبل لخضر لحدد مواعيدك

بطمنك يا يمّه نقرّب بعيدك
وعروق دمنا تتغلل وتمشي بوريدك

يا يمّه بعدك نايمه قومي لبشّرك
قبل ما حدا يخبرك ويبشّرك